هل موقع لاكى ايجيبت نصاب تجربتى مع نصب مواقع الكاش باك
![موقع لاكى ايجيبت](https://www.akhbrcom.com/wp-content/uploads/2022/02/هل-موقع-لاكى-ايجيبت-نصاب-تجربتى-مع-نصب-مواقع-الكاش-باك-2023.jpg)
موقع لاكى ايجيبت هل نصاب؟، لاكى ايجيبت Lucky Egypt من أحد مواقع الكاش باك الموجودة على الانترنت اللى بتديلك نسبة كاش باك بنسب متفاوتة على مشترياتك الاون لاين من الانترنت. لكن السؤال المهم هل لاكى ايجيبت نصاب ام صادق؟.
ده اللى هنعرفه من خلال تجربتى الشخصية معاهم اللى هحكيها لكم بكل تفاصيلها من خلال شبكة اخباركم. مع شرح تجربتى الكاملة مع نصب مواقع الكاش باك وخداعها للعملاء. كذلك هوضحلك عيوب ابلكيشن لاكي وعيوب خدمة عملاء لاكي. من خلال هذا الموضوع الذى بعنوان هل موقع لاكى ايجيبت نصاب تجربتى مع نصب مواقع الكاش باك.
موقع لاكى ايجيبت
زى ناس كتير أنا بفضل شراء جميع إحتياجاتى وطلبات البيت اون لاين. وتقريباً بشتري كل طلباتى من موقع واحد وهو أمازون مصر.
ولأن مشترياتى بتكون كتيرة خصوصاً فى أيام العروض والتخفيضات. ولأنى كنت بعمل اوردر او اتنين فى الإسبوع فكان بيجيلى كاش باك كويس جداً من موقع لاكى ايجيبت، على جميع مشترياتى.
وكنت بتمنى ان الموقع يكون صادق عشان مقعش فريسة نصب مواقع الكاش باك الوهمية.
كاش باك لاكى ايجيبت
لأنى كنت بعمل اوردرات كتير من أمازون مصر من خلال موقع لاكى ايجيبت زى ما قولت. وقدرت اعمل مع موقع لاكى ايجيبت فى اقل من ثلاثة أشهر كاش باك بقيمة 1949 جنيه.
ودى تعتبر قيمة كاش باك كويسة جداً، على اعتبار ان دى فلوس جايه ببلاش. وكنت بسأل نفسى ياتري انا هقدر اسحب الفلوس دى فعلاً ولا الموقع هينصب عليه.
المهم انا سحبت من الكاش باك بتاعى مبلغ 1000 جنيه خلال شهرين. لأن موقع لاكى ايجيبت بيسمح بسحب 500 جنيه فقط من رصيد محفظة الكاش باك كل 30 يوم.
نصب وتحايل موقع لاكى ايجيبت Lucky Egypt
ولما جيت اسحب كمان 500 قاموا علقوا حسابى فى موقع لاكى. وفى نفس اليوم لقيت موظفة من فريق خدمة عملاء موقع لاكى ايجيبت بتتصل بى فون وبتقولى. إحنا قفلنا حسابك فى لاكى عشان انته خالفت السياسة وانت بتشتري كـ تاجر مش مستهلك عادى.
وطبعا انا رفضت الكلام ده وقولت لها أنا مستهلك عادى مش تاجر أبداً، وقولت لها اللى انتوا بتعملوه ده اسمه نصب. وقدمت لهم اثباتات كتير تثبت إنى مستهلك عادى مش تاجر. منها مثلاً إنى بشتري بالقطعة وسلع ومنتجات مختلفة، لكن انا لو تاجر هشتري من كل منتج قطع كتيرة بالجملة.
المصيبة كمان هى ان خدمة عملاء موقع لاكى بيكذبوا ويقولوا ” احنا تواصلنا مع أمازون مصر وقالوا لنا انك تاجر يافندم ” ههه وده طبعاً كذب.
المهم الموظفة اللى إسمها “دينا م” قالتلى طيب احنا ممكن نرجعلك حسابك فى لاكى بس من غير ال 449 جنيه الموجودين فى الحساب.
وانا طبعا رفضت كلامها وقولت لها ازاى دى فلوسى ومش من حقكم تاخدوها مقابل إرجاع الحساب. قالتلى حضرتك اختار إما نرجعلك الحساب من غير الكاش باك او إن الحساب يفضل مُعلّق نهائياً.
وبما انها بتدينى اختيارين اصعب من بعض فانا قولت لها انا مش هختار حاجه من الخيارات اللى بتقولي عليهم دول واعملوا انتوا اللى يمليه عليكم ضميركم.
وهددتهم بإنى مش هسكت على حقى وهبلغ جهاز حماية المستهلك وشكاوى مجلس الوزراء وهعمل لهم دوشة فى مواقع التواصل وهحكى تجربتى.
المهم بعد مرور ساعة موظفة خدمة عملاء لاكى ايجيبت اتصلت بى مرة تانية وقالتلى احنا رجعنالك الحساب يافندم زى ما هو وفيه الكاش باك 449 جنيه. كذلك قالتلى بالنسبة لـ 500 جنيه اللى انته طلبت سحبها يوم 31 يناير هتوصلك بحد اقصى 14 يوم.
كيف سرق Lucky Egypt الكاش باك
المهم بتاريخ 8 فبراير 2022 راسلت دعم لاكى ايجيبت اسئلهم عن الـ 500 جنيه اللى طلبت سحبها فى تاريخ 31 يناير 2022 هل اخدت موافقه بالسحب وهتبعتوها امتى. رد عليه موظف خدمة عملاء لاكى ايجيبت من خلال الإيميل وقالى لاء لسه طلب سحب الرصيد مأخدش موافقة.
كذلك المفاجأة انهم تانى يوم من مراسلتى لهم مباشرة بتاريخ 9 فبراير 2022 قفلوا حسابى فى موقع لاكى والمره دى بقى قفل نهائى مش مجرد تعليق وبس زى المرة اللى فاتت.
وكذلك لما بحاول اعمل تسجيل دخول لحسابى فى لاكى بيظهر لى بالشكل ده: ” انتهك حسابك الشروط والأحكام الخاصة بنا وتم تعليقه ولن تتم معالجة أي عمليات استرداد نقدي معلقة. “
![نصب موقع لاكى ايجيبت](https://www.akhbrcom.com/wp-content/uploads/2023/03/هل-موقع-لاكى-ايجيبت-نصاب-تجربتى-مع-نصب-مواقع-الكاش-باك.jpg)
والكلام ده معناه باختصار انهم استولوا على رصيد الكاش باك بتاعى بقيمة 949 جنيه. اللى هما 500 جنيه طلبت سحبها بتاريخ 31 يناير + الكاش باك بتاعى اللى كان لسه موجود فى محفظتى فى الحساب بقيمة 449 جنيه.
كذلك لما حاولت التواصل مع دعم لاكى استوضح الأمر قالوا لى تانى نفس الكلام القديم انته تاجر مش مستهلك عادى وده مخالف للسياسة.
ورغم تأكيدى لهم انى مستهلك عادى مش تاجر للمرة المليون لكن مفيش فايدة لأنهم عايزين كده.
وبعدين اتصلت بخدمة عملاء امازون مصر لانهم متعاقدين مع لاكى عشان اسيب ليهم فيد باك بالقصة دى. موظفة خدمة عملاء أمازون مصر قالتلى احنا كـ أمازون ما نقدر نسويلك شىء ومشكلتك حاول تحلها مع موقع لاكى.
خلاصة تجربتى مع Lucky Egypt
الخلاصة: لاكى ايجيبت ” نصابين ” وسرقوا الكاش باك بتاعى وقيمته 949 جنيه.
اسهل حاجه يعملها موقع لاكى عشان يسرق رصيد محفظة الكاش باك بتاع العميل. انهم يقولوا لك بالكذب انك تاجر مش مستهلك عادى رغم انك مستهلك عادى مش تاجر ولا حاجه.
وكمان بصراحة انا ندمت على اشتراكى فى لاكى ايجيبت لأنهم اضاعوا عليه الكاش باك بتاعى واستولوا على مستحقاتى، خصوصاً ان متوفر مواقع تانية بديلة بتقدم نفس الخدمة.
تحديث: بتاريخ 14 مارس 2022 موظفة خدمة عملاء لاكى ايجيبت ” دينا م ” أنكرت انها كلمتنى عبر الهاتف وده تأكيد جديد على كذب وتدليس لاكى ايجيبت. ولو سألتنى وقولتلى انت ليه متأكد انها هى اللى كلمتك فعلاً مش يمكن كانت واحدة تانية.
هقولك متأكد لأنها لما كلمتنى فون قالتلى على ” حقائق من داخل حسابى “. زى قيمة الرصيد بتاعى داخل محفظة لاكى وتاريخ تعليق الحساب، ودى كلها حاجات محدش هيعرفها إلا موظف لاكى ايجيبت.
![نصب موقع لاكى ايجيبت](https://www.akhbrcom.com/wp-content/uploads/2023/03/هل-موقع-لاكى-ايجيبت-نصاب-تجربتى-مع-نصب-مواقع-الكاش-باك-1.jpg)
وبعد تواصلى مع خدمة عملاء أمازون قاموا بتكذيب لاكى ايجيبت. وقالوا انهم لا يرسلوا أى تقارير عن طبيعة نشاط العميل الى موقع لاكى.
وبس كده هى دى قصتى الكاملة مع موقع لاكى الموقع النصاب. ووضحت لك تجربتى مع نصب مواقع الكاش باك.
لو عندك أى اضافة او تعليق حابب تضيفه بخصوص مشكلتى مع لاكى ايجيبت تقدر تراسلنى من هنا.
من الجيد معرفة تجربتك مع لاكى ايجيبت شكرا لك.